Það vakti athygli síðasta sumar þegar Mikael Nikulásson, sérfræðingur Dr. Football hélt því fram að Stefán Logi Magnússon, þá markvörður Fylkis hafi ætlað að berja þáverandi þjálfara liðsins, Helga Sigurðsson.
Atvikið átti að hafa átt sér stað í sturtuklefanum í Kaplakrika eftir tap Fylkis gegn FH. ,,Ég er með fréttir sem ég var að heyra, það fer ekkert framhjá okkur hérna. Mér skilst að það hafi verið læti eftir leikinn í Kaplakrika, FH vann 2-1 eftir að hafa verið undir,“ sagði Mikael í Dr Football þættinum síðasta sumar..
Þá sagði Mikael að Helgi hefði gagnrýnt Stefán fyrir mark sem hann fékk á sig í tapinu. ,,Helgi Sigurðsson var ekki sáttur við markvörðinn sinn, Stefán Loga í fyrsta markinu. Ég kíkti á þetta mark aftur, ég skil Helga að hafa verið pirraðan. Hann átti að verja þetta, Helgi var eitthvað að skjóta á hann og skamma hann inni í klefa. Stefán Logi ákvað að svara fyrir sig, varð æstur. Mjög æstur út í Helga, síðan er komið inn í sturtu og átti að róa málin. Þá fer allt á annan endann, Stefán Logi ætlaði hreinlega að ráðast á Helga.“
Mikael sagði að það hefði þurfti nokkra á milli til þess að Stefán Logi myndi ekki lemja Helga. ,,Það þurfti 2-3 Fylkismenn á milli til að stoppa hreinlega slagsmál, á milli þjálfarans og markvarðarins. Það þurfti menn á milli. Menn voru heitir, Stefán Logi hefur ekki verið sáttur við þessa gagnrýni, það hefur átt að svara með hnefum. Helgi er þjálfarinn og þetta er markvörðurinn, það verður gaman að sjá hvort Stefán Logi spilar næstu leiki. Hvort þetta hafi áhrif á hópinn.“
Stefán Logi hafði aldrei svarað fyrir þetta en fór yfir málið í viðtali við Hafliða Breiðfjörð á Fótbolta.net í vikunni. „Hann spurði mig hvort ég ætlaði ekki að fara að axla ábyrgð sem ég taldi mig hafa gert með því að stíga inn og reyna að hjálpa félaginu á erfiðum tímum. Á móti kemur að þetta var búið á fimm sekúndum,“ sagði Stefán Logi við Fótbolta.net.
„Ég segi fátt en þó ‘ertu að grínast?’ og spyr hvort hann vilji ekki klára þetta? Þetta var blásið upp og þó ég hafi gripið í hálsmálið á honum er það ekki eins og ég hafi verið að kýla einhvern. Það er alvarlegt þegar fjölmiðlar mála það upp að ég sé ofbeldismaður. Það er ekki gaman fyrir mína nánustu, börnin mín og fleiri. Hlutur sem klárast á fimm sekúndum verður að dramatík.“
