Jean-Philippe Mateta, stjarna Mainz, segir að hann hafi lengi fylgst með Zlatan Ibrahimovic, leikmanni AC Milan sem allir kannast við.

Mateta fylgdist mikið með Zlatan sem krakki en vill vera eins og hann á velli frekar en utan vallar.

,,Zlatan var mín fyrirmynd sem krakki. Ég leitaði að stórum framherja sem hljóp hratt, sem var tæknilega góður og gat rekið boltann,“ sagði Mateta.

,,Hvað líkaði mér við hann? Markaskorunina. Það eina sem hann gerði var að skora mörk. Á eftir Cristiano Ronaldo og Leo Messi þá er hann besti markaskorari í sögunni.“

,,Það er ekki hægt að rífast um það. Það sem hann gerði var ótrúlegt. Fyrir utan það, hvernig hann talar á hrokafullan hátt við fjölmiðla, ég hef engan áhuga á því.“