Erik Hamren, landsliðsþjálfari Íslands er staddur í Portúgal þessa dagana til að heimsækja íslenska leikmenn og ræða við þá.
Aðeins er einn og hálfur mánuður í að íslenska liðið fái tækifæri til að tryggja sig inn á EM í sumar. Liðið mætir Rúmeníu í undanúrslitum um laust sæti á EM. Vinni liðið þann leikur mætir liðið Búlgaríu eða Ungverjalandi í úrslitum.
,,Ég er í Algarve til að hitta íslenska leikmenn, Ragnar Sigurðsson hjá FCK, Hjört Hermansson í Bröndby og Rúnar Már Sigurjónsson í Astana. Þessir hafa verið mest með mér,“ sagði Hamren.
,,Svo hef ég verið að skoða þá sem eiga séns og eru til framtíðar, Óskar Sverrisson í Hacken var í hópnum í janúar. Það var hans frumraun, svo hef ég skoðað stjörnur framtíðarinnar. Ísak Bergmann Jóhannesson sem er mjög spennandi. Hann er ekki í A-landsliðinu eins og er.“
Ísak er aðeins 16 ára gamall en er gríðarlegt efni, hann lék með aðalliði Norköppin í fyrra og gæti fengið fleiri tækifæri í ár. Ljóst er að Hamren er afar hrifinn af hans hæfileikum.
,,Hann hefur rosalega hæfileika og góð gæði, ég sá hann gegn Bröndby og hann hefur mikið að læra. Hann er þroskaður miðað við aldur, hann gæti orðið mjög góður. Ég hef rætt við þjálfara hans og hugarfarið hans virðist vera frábær, hann vill ná árangri.“
Hamren greindi einnig frá því að hann hefði skoðað Jón Dag Þorsteinsson kantmann AGF.
