Yfirvöld á Bretlandi eru uggandi vegna COVID-19 veirunnar sem nú er að breiða sér hratt út um landið, þessi veira er að greinast víða í Evrópu þessa dagana og búist er við henni á Íslandi næstu daga.

Samkvæmt Telegraph óttast yfirvöld fjölmenna viðburði og er það til skoðunar að banna íþróttaviðburði næstu tvo mánuðina, til að reyna að koma í veg fyrir frekari útbreiðslu á veirunni. Tugir þúsunda mæta á hvern leik í ensku úrvaldeildinni, smithættan þar er því mikil.

Þá yrði hætt við alla leiki í deildinni og segir Telegraph að ekki sé öruggt að Liverpool verði því enskur meistari.

Engar reglur eru til um slík mál, ef ekki væri hægt að klára deildina. Liverpool hefur 22 stiga forskot þegar 11 leikir eru eftir.

Telegraph segir að liðin sem eru í fallsæti gætu þannig sloppið við fall og að enginn sigurvegari yrði á þessari leiktíð, deildin færi svo aftur af stað næsta haust, á núlli.

Liverpool hefur ekki orðið enskur meistari í 30 ár og nú þegar allt er svo gott sem í höfn gæti COVID-19 veiran komið í veg fyrir sigur liðsins.