Ísland er komið í hóp lélegustu þjóða í Evrópu þegar kemur að deildarkeppni karla í uppfærðum lista UEFA er varðar styrkleika í Evrópukeppnum.
Hræðilegur árangur íslenskra félagsliða í Evrópukeppnum hefur orðið til þess að íslenska deildin er fjórða slakasta knattspyrnudeild í Evrópu.
Aðeins San Marínó, Andorra og Eistland eru með slakari deildir ef miðað er við styrkleikaröðun UEFA. Ísland mun á næsta ári missa eitt af Evrópusætum sínum vegna þesssa árangurs.
Ísland fellur niður listann í ár en Færeyjar og Gíbraltar eru með sterkari knattspyrnudeild en Ísland þessa stundina.
Í knattspyrnuhreyfingunni hafa menn áhyggjur af þessari stöðu en íslenskt lið vann ekki neinn Evrópuleik í sumar í fjórum tilraunum.