Diego Maradona var jarðaður í gær í úthverfi Buenos Aires en hann mun hvíla við hlið foreldra sinna. Vinir og fjölskylda Maradona fylgdu honum síðasta sporið.
„Mér líður illa,“ voru síðustu orð Diego Maradona þegar hann stóð upp frá matarborðinu heima hjá sér og ætlaði að leggjast í rúmið til að hvíla sig og reyna að ná bata. Þessi sextugi fyrrum knattspyrnumaður frá Argentínu lést á heimili sínu í Buenos Aires í Argentínu í fyrradag. Fyrir rúmum tveimur vikum hafði Maradona verið útskrifaður af spítala í borginni eftir að blæðing í heila koma upp. Hann gekkst undir aðgerð og hafði ekki náð bata eftir hana.
Maradona vildi hins vegar ekki láta jarða sig, ósk hans var að vera smurður og vera til sýnis eftir andlát sitt. Frá þessu greinir lögmaður hans.
Maradona hafði borið þessa ósk sína upp við vini sína og vildi hann að aðdáendur gætu séð sig hvenær sem er.
„Það kom upp sú hugmynd að reisa styttu af honum en ósk Maradona var að vera smurður,“ sagði lögmaður hans. Fjölskylda Maradona var ekki á sama máli og var hann jarðaður í gær, tveimur dögum eftir andlát sitt.
Að vera smurður af Vísindavefnum:
Líksmurningin fólst í því að rista líkið á hol frá hálsi til nára og fjarlægja öll líffæri. Skrokkurinn var síðan þveginn og vættur með ediki og loks fylltur með salti og stundum kryddjurtum. Síðan var líkið vafið í lín eða silki. Karla-Magnús (d. 814) og Vilhjálmur sigursæli (d. 1087) voru smurðir á þennan hátt. Í borgarstyrjöldinni í Bandaríkjunum (1861-65) komst hefð á að smyrja lík látinna hermanna.