Hannes Þór Halldórsson, markvörður íslenska landsliðsins, var að vonum svekktur eftir 2-1 tap gegn Ungverjum í kvöld.

„Ég held ég hafi aldrei verið eins sorgmæddur eftir að hafa tapað fótboltaleik,“ sagði Hannes í viðtali eftir leik.

Tapið sé sérstaklega svekkjandi í ljósi þess hversu nálægt því, Íslenska liðið var að tryggja sér sæti á EM.

„Þetta er bara algjörlega grátlegt. Menn voru að gefa allt í þetta en við vorum orðnir dálítið orkulausir.  Við vorum eins nálægt þessu og hægt var,“ sagði Hannes.

Aðspurður um framtíðina hjá landsliðinu kvaðst Hannes lítið vita um hana.

„Ég hef ekki hugmynd um það, það verður að koma í ljós seinna,“ sagði Hannes.