Stjórn íþróttafélagsins Magna frá Grenivík lýsir yfir stuðningi við ákvörðun KR um að vísa ákvörðun stjórnar KSÍ um að hætta keppni í Íslands- og bikarmótum til áfrýjunardómstóls sambandsins. Þetta kemur fram í yfirlýsingu sem félagið sendi frá sér í dag.
Í yfirlýsingunni segir meðal annars að stjórn Magna telji að Knattspyrnusamband Íslands hafi ekki haft heildarhagsmuni íslenskrar knattspyrnu í huga þegar ákvörðunin hafi verið tekin.
Yfirlýsing Íþróttafélagsins Magna í heild sinni:
Stjórn Íþróttafélagsins Magna á Grenivík harmar þá ákvörðun stjórnar KSÍ, dags. 30. október 2020, að hætta keppni í Íslandsmótum-og bikarkeppni KSÍ.
Að mati stjórnar Magna hefur stjórn KSÍ ekki haft heildarhagsmuni íslenskrar knattspyrnu í huga, sem henni þó ber, og ákvörðunin því sem slík andstæð hlutverki stjórnar KSÍ.
Stjórn Magna lýsir yfir stuðningi við þann málflutning og málatilbúnað sem stjórn knattspyrnudeildar KR hefur haft uppi undanfarna daga og styður ennfremur þá ákvörðun KR að vísa ákvörðun stjórnar KSÍ til áfrýjunardómstóls sambandsins. Líkt og KR, telur Magni verulegan vafa leika á því hvort ákvörðun stjórnar KSÍ standist lög sambandsins og leyfir sér að vona að áfrýjunardómstóll sambandsins felli ákvörðunina úr gildi.
Stjórn Íþróttafélagsins Magna
