A.C. Milan og Roma gerðu 3-3 jafntefli í ítölsku úrvalsdeildinni í kvöld. Hinn 39 ára gamli Zlatan Ibrahimovic, heldur áfram að skora.Hann skoraði tvö mörk í kvöld og er kominn með 6 mörk í þremur leikjum í ítölsku úrvalsdeildinni á þessu tímabili.
Zlatan kom A.C. Milan yfir með marki strax á 2. mínútu leiksins.
Á 14. mínútu jafnaði Edin Dzeko metin fyrir Roma með marki eftir stoðsendingu frá Pellegrini.
Milan komst hins vegar aftur yfir á 47. mínútu með marki frá Alexis Saelemaekers.
Roma fékk vítaspyrnu á 71. mínútu. Jordan Veretout tók spyrnuna og jafnaði leikinn einn á ný fyrir gestina.
Zlatan kom Milan aftur yfir með sínu öðru marki í leiknum úr vítaspyrnu á 79. mínútu.
Leikmenn Roma neituðu hins vegar að gefast upp. Á 84. mínútu jafnaði Marash Kumbulla leikinn fyrir Roma.
Fleiri mörk voru ekki skoruð í leiknum, lokatölur 3-3 jafntefli. A.C. Milan er í 1. sæti eftir leikinn með 13 stig eftir 5 leiki. Roma er í 9. sæti með 8 stig.