Karl Óskar Agnarsson einn dyggasti stuðningsmaður KR og sjálfboðaliði fyrir félagið í mörg ár féll frá í vikunni. Þetta kemur fram á heimasíðu féalgsins.
Karl Óskar lést 68 ára að aldri en hann hafði verið heiðraður fyrir störf sín fyrir KR, hann var alltaf tilbúinn að hjálpa félaginu sínu.
„Kalli vinur okkar og félagi lést sl. miðvikudagskvöld á Landspítalanum. Kalli fæddist þann 19. júní 1952 og var því 68 ára gamall þegar hann lést. Kalli var einn af okkar dyggustu stuðningsmönnum og sjálfboðaliðum. Í mörg ár sá hann um vallarklukkuna þegar strákarnir og stelpurnar voru að spila;“ skrifar Gylfi Dalmann Aðalsteinsson, formaður KR á heimasíðu félagsins í dag.
Karl var alltaf mættur á völlinn löngu áður en leikur hófst og ræddi við gesti og gangandi. „Alltaf mættur löngu fyrir leiki, tók á móti okkur fagnandi sem voru að mæta á leiki, gjarnan með liðsuppstillinguna tilbúna á blaði til að sýna manni. Kalli var var oftar en ekki mættur í dyragættina til að taka við miðum þegar Karfan var að spila. Einnig var hann dyggur stuðningsmaður Píluvina KR og lét sig ekki vanta á viðburði Pílunnar. Hann tók líka þátt í getraunastarfi KR í gegnum tíðina.“
Fyrir átta ár síðum var Karl heiðraður fyrir störf sín. „Árið 2012 þegar Kalli varð sextugur fékk hann sérstaka viðurkenningu fyrir sjálfboðaliðastarf sitt fyrir gamla góða KR. Við KR-ingar minnumst Kalla með miklu þakklæti fyrir allt sem hann gerði fyrir gamla góða KR og þökkum honum samfylgdina í gegnum tíðina. KR-ingar senda ættingjum Kalla innilegar samúðarkveðjur,“ skrifar Gylfi Dalman á vefsíðu félagsins.
