Það virðist vera á mismunandi hátt sem reglugerð yfirvalda er túlkuð af þjálfurum í efstu deild karla á Íslandi. Nú þegar stefnt er að því að hefja leik á Íslandsmótinu í knattspyrnu í nóvember.

Stjórn KSÍ tók þá ákvörðun í gær að reyna að klára mót sín fyrir 1 desember eins og kveður á um í reglugerð sambandsins. Samkvæmt reglugerð frá heilbrigðisráðherra eru æfingar bannaðar innan ÍSÍ á höfuðborgarsvæðinu og þar fellur KSÍ undir, hins vegar má æfa í hópum ef 2 metra reglan er virt. Þetta hefur orðið til þess að lið á höfuðborgarsvæðinu hafa túlkað reglurnar á mismunandi hátt.

Þannig æfðu Breiðablik, KR, Valur og fleiri lið á höfuðborgarsvæðinu í gær en á sama tíma töldu Stjarnan, FH og Víkingur að reglurnar væru ekki skýrar og fóru því ekki á æfingu. Fleiri lið áttu í erfiðleikum með að lesa í reglur yfirvalda.

„Við höfum fengið þær upplýsingar um að það sé leyfilegt að æfa, það kemur frá sóttvarnarlækni og embætti landlæknis, að það sé leyfilegt að æfa miðað við tveggja metra reglu. Það er í lagi að sparka bolta á milli sín en ekki taka hann með höndum eða skalla boltann. Svo er auðvitað að gæta að sóttvörnum og hreinsun á búnaði,“ sagði Guðni Bergsson formaður KSÍ í samtali við 433.is í dag.

Hann segir eðlilegt að skilningur liða hafi verið mismunandi á regluverkinu og því hafi sambandið kallað eftir skýrari leiðbeiningum sem séu þær að æfingar knattspyrnuliða á höfuðborgarsvæðinu eru leyfðar ef farið er eftir settum reglum.

Annað vandamál blasir svo við félögum á höfuðborgarsvæðinu eftir að ákveðið var að loka öllum íþróttamannvirkjum næstu dagana. Óvíst er hvernig það leysist nú þegar grænt ljós er komið á æfingar.

Blikarnir í Smáranum ætla að vera klárir 8 nóvember þegar Maxið byrjar vonandi aftur pic.twitter.com/3TmGtI58ad

— Hörður S Jónsson (@hoddi23) October 20, 2020

Reglugerð ráðherra:

Höfuðborgarsvæðið
Íþrótta og heilsuræktarstarfsemi: Heimilt er með skilyrðum að standa fyrir og stunda íþrótta- og heilsuræktarstarfsemi ef um er að ræða skipulagða hóptíma þar sem allir þátttakendur eru skráðir. Við þessar aðstæður er skylt að virða 2 metra regluna, þátttakendur mega ekki skiptast á búnaði meðan á tíma stendur og allur búnaður skal sótthreinsaður á milli tíma. Sameiginleg notkun á búnaði sem er gólf- loft- eða veggfastur, s.s. á heilsuræktarstöðvum, er óheimil.
Heimildir fyrir íþróttastarfi, æfinga og keppna á vegum ÍSÍ gilda ekki á höfuðborgarsvæðinu.