Jamie Carragher, fyrrverandi leikmaður Liverpool og núverandi sérfræðingur hjá SkySports, varði Jordan Pickford, markvörð Everton, eftir tæklingu hans á Virgil Van Dijk í leik Everton og Liverpool í gær.
„Það er skiljanlega mikil gremja hjá Liverpool, stuðningsmönnum félagsins og jafnvel hjá hlutlausum knattspyrnuaðdáendum sem vilja að Pickford fái bann. Það þarf að fara varlega í þessa hluti,“ sagði Carragher í umfjöllun SkySports.
Tæklingin varð til þess að Van Dijk þarf nú að gangast undir aðgerð á hné.
„Já þetta var skelfileg tækling. Ég hef fótbrotnað og ég fótbraut næstum því Nani í knattspyrnuleik. Svona hlutir geta því miður gerst í knattspyrnu,“ sagði Carragher.
Að sögn Carragher eru svona hlutir ekki viljaverk.
„Það fer enginn í tæklingu með það markmið að vísvitandi meiða einhvern. 99% af svona tæklingum sem leiða til alvarlegra meiðsla eru ekki gerðar með það að markmiði að meiða einhvern,“ sagði Carragher.
Hann fór síðan aðeins yfir frammistöðu Pickford.
„Pickford hefur verið út um allt í markinu hjá Everton síðustu 12 mánuði. Í þessu atviki tekur hann glórulausa ákvörðun sem einn besti leikmaður ensku úrvalsdeildarinnar verður því miður fyrir.“
Enski boltinn á 433 er í boði 
