„Fyrst eftir að smitið kemur upp, þarna rétt fyrir æfingu sem við fáum tilkynningu um það. Það var auðvitað bara sjokk. En við náðum svona að klára það. En svo var dagurinn í kjölfarið bara algjör ringulreið. Þjálfarateymið var sett í sóttkví og allir starfsmenn og óvissan mikil,“ sagði Freyr Alexandersson aðstoðarþjálfari Íslands við RÚV í dag um hvernig síðustu dagar hafa verið.
Freyr ásamt öðru starfsliði íslenska karlalandsliðsins var sett í sóttkví á þriðjudag eftir að COVID-19 veiran greindist í Þorgrími Þráinssyni. Ísland mætti svo Belgíu í gær þar sem Freyr og Erik Hamren gátu ekki stýrt liðinu.
„Svo voru líka bara fullt af hlutum í þessu sem maður þekkti ekkert og þurfti að fá svör við. Eins og hvernig við gætum komið nýju starfsfólki inn og hverjir gætu mögulega komið. Þannig ég get bara lýst þessum degi sem mjög kaótískum. En það rættist mjög vel úr þessu. Allir lögðust á eitt að leysa þessa hnúta,“ sagði Freyr við RÚV.
Freyr og Hamren fengu undanþágu í gær til að mæta á völlinn og vera í glerbúri, fram hefur svo komið að það hafi verið mistök af hálfu Víðis Reynissonar að leyfa þeim að ferðast á milli staða verandi í sóttkví.
Freyr naut þess hins vegar að horfa á leikinn í glerbúrinu á meðan voru Arnar Þór Viðarsson og Davíð Snorri Jónsson á hliðarlínunni og komu skilaboð frá Hamren áleiðis.
„Þetta var rosalega óþægilegt og skrítnar tilfinningar. En við vorum vel undirbúnir. Við vorum búnir að funda í gegnum fjarfundarbúnað með Arnari, Davíð og Dodda og fara yfir vinnureglur og verkaskiptingu. Þannig þeir voru með allt sitt upp á tíu. Samskiptin gengu síðan vel. Þeir fóru eftir því sem að við báðum þá um að fylgja. Svo komu þeir líka með punkta inn á milli. Það góða við að vera þarna uppi samt var að maður hafði gríðarlega góða yfirsýn yfir leikinn. Að mörgu leyti. Þannig að mörgu leyti sáum við leikinn betur og gátum brugðist hraðar við. Svo voru þeir frábærir niðri á bekk að bregðast við því sem við komum með niður til þeirra. Bara miðað við allt kaósið sem var þarna á undan og hvað þetta gerðist allt hratt að þá gekk þessi partur rosalega vel og. Þeir þrír og allt nýja starfsteymið á allt hrós skilið. Ég er ofboðslega stoltu af þeim, alveg eins og ég er stoltur af leikmönnunum. Þetta var ekki auðvelt fyrir leikmennina að fá bara nýtt gengi í kringum sig. Þannig að þetta var bara eins góð framkvæmd og kostur var á,“ sagði Freyr við RÚV.
