Kristján Óli Sigurðsson knattspyrnusérfræðingur hjá Dr. Football hlaðvarpsþættinum fullyrðir að FH vilji fá Ólaf Jóhannesson þjálfara Stjörnunnar heim í heiðardalinn nú þegar tímabilinu í efstu deild lýkur. Ólafur varð Íslandsmeistari FH í þrígang frá 2003 til 2007 þegar hann stýrði liðinu áður en hann tók við íslenska landsliðinu. Það var í þriðja sinn sem hann stýrði FH.
Eftir fjögur ár í starfi með íslenska landsliðið var Ólafur þjálfari Hauka og síðan Vals þar sem hann vann fjóra titla á fjórum árum. Ólafur fékk ekki nýjan samning hjá Val fyrir ári síðan og tók við Stjörnunni þar sem hann stýrir liðinu ásamt Rúnari Páli Sigmundssyni.
,,Hann er fyrstur á blaði hjá FH-ingum, þeir vilja fá hann heim,“ sagði Kristján Óli Sigurðsson sérfræðingur Dr. Football um málið.
Árangur FH undir stjórn Eiðs Smára Guðjohnsen og Loga Ólafssonar hefur vakið verðskuldaða athygli en liðið situr nú í öðru sæti efstu deildar karla. Eiður og Logi tóku við liðinu um mitt sumar, liðið hefur unnið 8 af ellefu leikjum sínum undir stjórn þeirra. Eiður og Logi tóku við FH þegar Ólafur Kristjánsson stökk á tilboð Esbjerg í Danmörku en samningur Eiðs Smára og Loga rennur út eftir tímabilið.
Kristján Óli sagði tvennar sögur af því hvort Ólafi stæði til boða að taka við liðinu einn eða með Eiði Smára. „Það fer tvennum sögum af því, að hann eigi að taka við þessu einn eða taki við af Loga,“ sagði Kristján Óli.
„Við erum ekki Séð og Heyrt, þetta eru áreiðanlegar heimildir,“ sagði Kristján að lokum um málið..
