Íslenska knattspyrnan er nú farin aftur af stað eftir kórónuveirupásu en þó án áhorfenda í þetta skiptið. Það stoppaði þó ekki Silfurskeiðina, stuðningsmannasveit Stjörnunnar í gær.

Fótbolti.net greindi frá því í dag að dyggustu meðlimir stuðningsmannasveitarinnar hefðu mætt fyrir utan girðinguna á Samsungvellinum í Garðabæ í gær. Rúnar Páll Sigmundsson, þjálfari Stjörnunnar, sagði fyrir leikinn að hann vonaðist til þess að stuðningsmannasveitin geti verið viðstödd leikinn. „Við vonum að Silfurskeiðin komist allavega að!“

Í textalýsingu Fótbolta.net í gær segir frá því að Silfurskeiðin hafi ekki látið áhorfendabannið stoppa sig. „Silfurskeiðin lætur ekki Covid No Fans stoppa sig á að styðja sína menn, þeir eru mættir vinstra megin við stúkuna fyrir utan völlinn og eru búnir að vera syngjandi frá fyrstu mínútu!“ skrifaði blaðamaðurinn Arnar Laufdal sem sá um textalýsinguna en hann hrósaði þeim einnig fyrir að mæta. „Vel gert!“

Gísli Gíslason, varaformaður KSÍ, ræddi við blaðamann um málið. Þar sagði hann að KSÍ stjórni ekki því sem fari fram fyrir utan völlinn. Hann hvetur þó til þess að fólk passi sig á að gæta að tveggja metra reglunni og öðrum sóttvörnum.