Það vakti nokkra athygli í vetur þegar Brynjólfur Willumsson tók út millinafnið Darri og breytti því í Andersen.

Brynjólfur er tvítugur sóknarmaður en búist er við miklu af honum þegar Pepsi Max-deild karla fer af stað nú í næstu viku. Framherjinn hefur komið við sögu síðustu tvö tímabil en búist er við að hann verði í lykilhlutverki í sumar.

Brynjólfur hafði ætlað að breyta nafni sínu við fermingu en lét svo verða af því í vetur.

„Þetta er ættarnafnið okkar, tvö yngri systkini mín heita þetta og ég ákvað loks að láta breyta þessu,“ sagði Brynjólfur Andersen í viðtali við Vísi.

„Ég hef aldrei verið kallaður Darri af neinum, ekki einu sinni mömmu og pabba. Hef heldur aldrei notað það sjálfur og það er ekki tengt neinu sérstöku svo ég ákvað að breyta því,“

Faðir Brynjólfs er alþingismaðurinn og fyrrum þjálfarinn Willum Þór Þórsson.