,,Sá sem að mætir á blaðamannafundi er ekki endilega sá mikilvægasti,“ sagði Víðir Reynisson, , yfirlögregluþjón á Stöð2 Sport í gær.

Víðir hefur vakið mikla athygli í starfi sínu síðustu vikur. Víðir hefur verið í framlínunni þegar kemur að ákvörðun er varðar kórónuveiruna. Hann situr daglega fréttamannafundi og fer yfir stöðu mála með þjóðinni.

Víðir er í starfi hjá KSÍ, þar er hann öryggisstjóri. Hann fékk tímabundið leyfi frá starfinu til aðstoða ríkislögreglustjóra á dögunum. Víðir hefur farið á þrjú stórmót með íslenska landsliðinu, tvö með karlalandsliðinu og eitt með kvennalandsliðinu.

KSÍ á ekki von á því að fá Víði aftur til starfa sem starfsmann í fullt starf, sambandið vonast til þess að Víðir verði þó til taks þegar á þarf að halda.

Í þættinum á Stöð2 Sport í gær fór Víðir yfir það fólk sem hann hefur lært mikið af. ,Maður hefur lært mjög mikið bæði af leikmönnum og þjálfurum. Ég hef nefnt þessi dæmi eins og Frey og Heimi, Lars og Erik, þessa þjálfara sem maður hefur mest unnið með, og svo leikmenn eins og Aron Einar og Söru. Það eru svo margir leiðtogar þarna,“ segir Víðir í Sportinu í dag.

Víðir segir að þeir sem eru mest í fjölmiðlum eins og hann séu bara hluti af stórri heild sem vinni frábært starf. Hann tók dæmi úr íslenska landsliðinu.

„Það eru oft ákveðnir leikmenn í „frontinum“ en svo er ekki síður gaman að kynnast þessum leikmönnum sem eru ekki endilega alltaf í viðtölunum en eru samt ótrúlegir leiðtogar og vigta svakalega mikið inn í hópinn þó að þeir séu ekki áberandi. Þeir eru ómissandi púsl í þessu púsluspili sem þjálfararnir eru með. Þetta eru ekki endilega leikmenn sem eru að spila mikið. Ólafur Ingi Skúlason til dæmis. Hann var í kringum landsliðið í gríðarlega mörg ár en er ekki með neitt brjálæðislega mikinn fjölda landsleikja, en alveg ótrúlega mikilvægur hlekkur í hópnum. Hann var gaurinn sem að leysti mál og braut upp með húmor sínum og nærveru.“