Guðmundur Benediktsson, Gummi Ben, var gestur í útvarpsþætti Fótbolta.net fyrir leik gegn Moldóvu í undankeppni EM í gær.

Gummi er sjálfur fyrrum landsliðsmaður en hann gerði einnig garðinn frægan í efstu deild á Íslandi.

Hann ræddi á meðal annars samband sitt við Atla Eðvaldsson sem lést á dögunum eftir baráttu við krabbamein.

Gummi vann með Atla hjá KR á sínum tíma og var samband þeirra lengi gott innan sem utan vallar.

Hann sagði eina skemmtilega sögu af Atla er þeir voru saman hjá KR árið 1998.

,,Við áttum athyglisvert samband. Atli gerði ótrúlega mikið fyrir mig og ég reyndi að gera líka mikið fyrir hann á vellinum en ég hafði svo gaman að honum,“ sagði Gummi.

,,Mér finnst gaman að hlæja og hann sagði þetta við mig öll árin eftir að hann hætti að þjálfa mig:

‘Tókstu ekki eftir þessu Gummi þegar ég talaði við ykkur í klefanum að ég fór alltaf framhjá þér. Ég gat ekki horft í augun á þér því ég vissi að þú værir að grenja úr hlátri inn í þér, að mér og því sem ég var að segja. Ég gat aldrei horft á þig.’

,,Hann var svo hræddur um að fara að hlæja sjálfur.“

Við mælum með þættinum sem má heyra í heild sinni hér og þar segir Gummi fleiri sögur.