Bjarni Helgason, blaðamaður á Morgunblaðinu stingur niður penna í blað dagsins og ræðir um áhuga kvenna á kvennaknattspyrnu.
Íslenska kvennalandsliðið sem hefur staðið sig með miklum sóma síðustu ár, er enn að berjast við það að fá fólk á völlinn. Bjarni bendir á hræsnara sem hrópa og kalla á samfélagsmiðlum en sjást síðan aldrei á vellinum.
,,Samkvæmt nýjustu tölum frá KSÍ eru 25.000 knattspyrnuiðkendur á Íslandi í dag. Til þess að teljast til knattspyrnuiðkenda þarftu að annaðhvort æfa eða keppa í fótbolta. Af þessum 25.000 iðkendum eru einn þriðji kvenkyns eða rúmlega 8.000. Það þýðir að rúmlega átta þúsund stelpur eða konur æfa eða keppa í fótbolta á Íslandi og iðkendum hefur fjölgað jafnt og þétt á milli ára,“ skrifar Bjarni í blað dagsins.
Liðið var að ljúka við tvo fyrstu leiki sína í undankeppni EM og vann tvo góða sigra, lítið var af fólki í stúkunni.
,,Íslenska kvennalandsliðið í knattspyrnu hóf leik í undakeppni EM 2021, mánudaginn 29. ágúst, þegar liðið vann 4:1-sigur á Ungverjalandi á Laugardalsvelli. 2.019 manns mættu á leikinn. Ísland mætti svo Slóvakíu 2. september og þá mættu 2.346 manns á völlinn og sáu Ísland vinna 1:0-sigur. Það var geggjað veður báða leikdagana, hitinn var í kringum 12° stig og heiðskýrt.“
Bjarni bendir svo á það sem hafa hæst um jafnrétti í öllu og þá sérstaklega knattspyrnuhreyfingunni.
,,Það er í tísku í dag að móðgast fyrir hönd annarra en ég fyrir mitt litla leyti fæ bara ekki skilið af hverju það mæta rúmlega 2.000 manns á landsleik á virkum degi í frábæru veðri. Þegar HM-kvenna fór fram í sumar kepptist fólk við að hrósa öflugum og litríkum knattspyrnukonum og drulla yfir grútlina og persónulausa knattspyrnumenn á sama tíma.“
,,Það er svo sem ekki hægt að gera stórar kröfur til fólks sem hugsar í lækum. Það veldur mér hins vegar vonbrigðum að fólk sem hefur kallað eftir jafnrétti í knattspyrnuhreyfingunni hérna heima geti ekki drullað sér á völlinn. Þá finnst mér skítt, með fullri virðingu fyrir bæði konum og körlum, að konur standi ekki betur við bakið á öðrum konum með því að mæta með unga knattspyrnuiðkendur sína á leiki hjá kvennalandsliðinu.“
