Cristiano Ronaldo er búinn að koma Portúgal yfir gegn Litháen í undankeppni EM en leikurinn er í gangi.

Ronaldo skoraði fyrsta mark leiksins af vítapunktinum í kvöld í leik sem Portúgal á að vinna.

Ronaldo er nú fyrsti landsliðsmaður frá Evrópu til að skora 90 mörk fyrir sitt landslið.

Aðeins einn maður hefur skorað meira fyrir landslið sitt en Ronaldo og það er goðsögnin Ali Daei.

Daei er fyrrum leikmaður Íran en hann skoraði 109 mörk í 149 landsleik frá 1993 til 2006.

Ronaldo er 34 ára gamall og er spurning hvort hann nái að bæta met Daei áður en ferlinum lýkur.