Valur og Breiðablik áttust við í stórskemmtilegum leik í Pepsi Max-deild karla í gær. Valsmenn byrjuðu leikinn afar vel og komust í 2-0 snemma leiks með mörkum frá Birki Má Sævarssyni og Patrick Pedersen. Íslandsmeistararnir stjórnuðu leiknum í byrjun en undir lok fyrri hálfleiks þá svöruðu Blikar fyrir sig.

Brynjólfur Darri Willumsson skoraði fyrsta mark Blika á 37. mínútu og stuttu seinna gerði Andri Rafn Yeoman magnað jöfnunarmark. Brynjólfur var svo aftur á ferðinni á 62. mínútu er skot hans fékk að rúlla í net Valsmanna eftir klaufagang.

Fyrirliðinn Haukur Páll Sigurðsson tryggði Val svo stig ekki löngu seinna með skallamarki og lokastaðan, 2-2. Rætt var um leikinn í Dr. Football í dag.

Mikael Nikulásson, sérfræðingur þáttarins heldur því fram að lið Vals sé ekki í nógu góðu formi. ,,Nú er 17 umferð í gær, þeir voru sprungnir í seinni hálfleik í gær. Blikar voru klaufar að klára þetta ekki,“ sagði Mikar í Dr Football.

,,Valur er ekki í standi, svo koma allir og fara að bomba á Emil Lyng. Hann er með 10 mörk í 30 leikjum í efstu deild, hann er ekkert búinn að vera að spila í sumar. Á að fara að kenna honum um? Formið er ekkert á þessu liði, í restina í gær þegar Kristinn Freyr kemst framhjá Gaua Lýðs. Þeir náðu ekki að klára sóknina, þetta var dauðafæri. Þeir voru sprungnir, lélegt hjá Blikum að klára ekki þennan leik.“

Leikmenn Vals meiddust nokkrir í gær, Kristján Óli Sigurðsson segir það oft fylgja liðum sem ekki eru í formi. ,,Það virðist ekki vera, þeir eru búnir að tapa niður fullt af leikjum. Patrick Pedersen meiðist, það var ekki alvarlegt. Það eru meiri líkur á að þú meiðist ef þú ert ekki í formi, þeir eru ekki í formi.“

Mikael hélt áfram að ræða um ástandið á leikmönnum Vals, hann segir leikmenn og þjálfara Vals ekki geta svarað fyrir hlutina. Hann segist vera með svörin.

,,Það er verið að spyrja Hannes, sem er með einhverja 70 landsleiki. Það er verið að spyrja Óla Jó, margfaldan Íslandsmeistara sem þjálfara, það er verið að spyrja Eið Aron þeirra besta leikmann í fyrra. Þeir geta ekki svarað, þeir skilja ekki af hverju liðið missir niður forystu. Þeir eru bara ekki í standi, ég get svarað þessu fyrir þá.“

,,Þeir eru ekki í standi, af hverju missa þeir alltaf hausinn þegar þeir komast yfir? Þeir eru ekki í standi til að klára forystuna, ömurlega lélegt hjá Breiðabliki að klára þetta ekki eftir að hafa komist yfir. Það er að koma september.“

Umræðuna má heyra hér að neðan.