Hlaðvarpsþátturinn, 90 mínútur heldur áfram á fullu fjöri en um er að ræða þátt sem Hörður Snævar Jónsson, ritstjóri 433.is stýrir.

Þátturinn hefur notið mikilla vinsælda en afar áhugaverðir gestir hafa komið í þáttinn.

Gestur þáttarins að þessu sinni er Kolbeinn Sigþórsson sem er einn allra besti knattspyrnumaður sem Ísland hefur átt, þá sérstaklega þegar hann hefur klæðst treyju landsliðsins.

Kolbeinn samdi við tyrknenska stórliðið Galatasaray árið 2016 en hann skrifaði undir lánssamning við félagið.

Það voru miklar væntingar gerðar til Kolbeins sem átti að sjá um markaskorun liðsins.

Kolbeinn spilaði hins vegar aldrei leik fyrir Galatasaray og eftir fjóra mánuði var hann sendur aftur til Frakklands.

Sagan á bakvið þetta ævintýri í Tyrklandi er áhugaverð en stuðningsmönnum Galatasaray var lofað hlutum sem voru aldrei að fara að gerast.

,,Maður fann að fólk beið eftir því að maður myndi spila. Læknarnir í liðinu voru að segja að ég myndi byrja að spila eftir viku,“ sagði Kolbeinn.

,,Þá var ég bara uppi á hóteli með löppina upp í loftið. Hún var bólgin og ég gat ekki labbað. Þeir voru alltaf að gefa þeim vonir um að ég væri að fara að spila því pressan var svo mikil.“

,,Ég var nýkominn, aðalframherji klúbbsins og svo kem ég og get ekkert spilað. Eftir þessa aðgerð sem átti að vera auðveld.“

,,Ég komst aðeins í bolta en svo eftir korter með bolta þá byrjaði ég að bólgna. Þá gat ég ekkert hreyft mig eftir það. Á endanum var ákvæði í samningnum að ef ég myndi ekki spila eftir fjóra mánuði að þá mættu þeir láta mig fara. Það var ákveðið að rifta.“

,,Eftir það fer ég í skoðun hjá Nantes aftur og þeir þá pínu gefa í skyn að ég þyrfti að leggja skóna á hilluna.“