Jonathan Hendrickx lék með Breiðabliki í kvöld sem mætti Víkingi Reykjavík í Pepsi Max-deild karla.
Hendrickx og félagar unnu 3-1 sigur á Víkingum en hann þótti standa sig með prýði í vængbakverðinum.
,,Við vorum vonsviknir eftir leikinn í síðustu viku og vildum ná þremur stigum í dag,“ sagði Hendrickx.
,,Við gerðum vel, kerfið virkaði vel, 3-4-3 svo við gátum pressað á þá. Við skoruðum þrjú mörk og vorum óheppnir að fá eitt mark á okkur.“
,,Þetta kerfi hentar okkur vel því við erum sterkir, Damir, Viktor og Elli þeir eru bestu hafsentarnir. Það leyfir okkur að spila hærra og pressa á þá og halda boltanum.“
Hendrickx er orðaður við brottför þessa dagana en hann svaraði þeim sögusögnum í kvöld.
,,Eins og Gústi sagði þá er lið í Belgíu sem hefur áhuga á mér og ég hef beðið eftir því tækifæri lengi.“
,,Ég fór til Portúgals fyrir einu og hálfi ári og nú er kannski kominn tími á að ég fari aftur heim. Ég hef notið þess að spila hérna en ekkert er klárt ennþá.“
,,Ég vil fá að fara ef félagið kemur með tilboð og þeir ná samkomulagi. Ég vil komast heim og vera nær fjölskyldunni.“
