Erik Hamren landsliðsþjálfari Íslands hefur valið hóp sinn fyrir fyrsta verkefni liðsins í undankeppni EM. Liðið mætir Andorra á föstudag í næst viku og þremur dögum síðar er leikur við Heimsmeistara Frakka, í París.

Ef allt er eðlilegt mun íslenska landsliðið vinna sigur á Andorra en Freyr Alexandersson, aðstoðarlandsliðsþjálfari fór vel yfir liðið á fréttamannafundi í dag.

Freyr talar lið Andorra mikið upp en það er erfitt að spila gegn þeim. ,,Af hverju ég veit að þetta verður erfiður leikur? Úrslitin í Þjóðadeildinni þar sem þeir unnu ekki leik. Gerðu þrjú jafntefli á heimavelli, stór munur á þeim heima og úti. Þeir nálgast leikina öðruvísi, staðreyndin er þessi að í síðustu sex heimaleikjum hafa þeir bara tapað einu sinni, það var geng Portúgal, þeir skoruðu þá mörkin á síðustu tuttugu mínútum leiksins.“

,,Þeir sem halda að við séum að fara til Andorra og valta yfir þá, við setjum þá kröfu á þá að við vinnum. Ég vil að fólk átti sig á því að þetta verður ekki göngutúr í garðinum.“

Freyr kveðst finna til með RÚV sem sýnir leikinn í beinni í sjónvarpi næsta föstudag.

,,Ég öfunda ekki þá sem eru með sjónvarpsréttinn af þessum leik, þetta verður ekki fallegur leikur,“ sagði Freyr og útskýrði hvers vegna.

,,Þeir hægja á leiknum meira en ég hef séð, þetta er það erfiðasta sem ég hef gert að horfa á. Brjóta mikið af sér, 37 aukaspyrnur að meðaltali í leik. Við erum harðir í horn að taka en meðaltalið okkar er 19 aukaspyrnur. Þeir vilja pirra andstæðinga sína, við þurfum að vera undirbúnir í það. Hægur leikur og gríðarlega fastir fyrir, ofboðslega stoltir af því að spila fyrir þjóð sína.“