Aron Einar Gunnarsson, fyrirliði Íslands og leikmaður Al-Arabi er að jafna sig af meiðslum sem hann varð fyrir í október, meiðslin voru nokkuð alvarleg.

Fyrirliðinn er að koma til baka og ætti að vera leikfær í upphafi árs, góð tíðindi fyrir Al-Arabi sem hefur verið í veseni án Arons.

Þegar Aron meiddist þá kom gamall liðsfélagi hans á sjúkrahúsið og færði honum veglega gjöf. Aron hafði þá farið í aðgerð.  „Ég lenti í því sjálfur þegar ég meiðist. Það var strákur sem ég var að spila, með sem hætti reyndar eftir undirbúningstímabilið. Hann mætti upp á spítala með þrjú ilmvötn og úr upp á fimm þúsund dollara,“ segir Aron Einar í viðtali við Ísland í dag.

,,Það var ekki eins og maður hefði bara farið í litla aðgerð, það komu allir í heimsókn. Þetta eru ólíkar menningarheimar.“

Aron segir að mikil gjafmild sé í heimamönnum. ,,Það sýnir það að honum þótti vænt um mig og fann til með mér að vera uppi á sjúkrahúsi. Í trúnni eiga þeir að sjá um vini sína og þá sem minna mega sín,“ segir Aron.

Aron segir lífið ljúft í Katar. „Eftir að við fluttum þangað hef ég haft meiri tíma fyrir þau. Það er ekki jafn mikið af ferðalögum þar sem þetta er mjög lítið land og ekki jafn mikið af leikjum og álag eins og á Englandi.“