Björn Þorfinnsson, fjölmiðlamaður og skákmeistari, og Tómas Steindórsson, útvarpsstjarna og körfuboltasérfræðingur, mættu til Helga Fannars Sigurðssonar í Íþróttavikuna.

Tómas er stuðningsmaður West Ham, sem á veika von um að bjarga sér frá falli úr ensku úrvalsdeildinni í lokaumferðinni.

Tap Totteham gegn Chelsea í síðustu umferð þýðir að West Ham getur bjargað sér ef liðið vinnur Leeds og Tottenham tapar gegn Everton.

„Ég var smá að vonast til þess að þeir myndu enda þjáningar mínar og sækja bara stig, klára þetta,“ sagði Tómas um leik Chelsea og Tottenham og hló.

Björn benti á að Tottenham væru verri á heimavelli, en þeir taka einmitt á móti Everton þar í lokaumferðinni.

„Málið er að West Ham virðist ekki geta unnið leiki. Þeir eru búnir að fá leikina við Brentford og Newcastle. Sigur í öðrum hvorum hefði breytt stöðunni en við klúðruðum því,“ sagði Tómas hins vegar.

„Þetta Tottenham-lið hefur komið manni á óvart aftur og aftur með andleysi sínu, svo þeir eru engan veginn yfir það hafnir að tapa þarna,“ sagði Helgi þá.

Nánar í spilaranum.