Liverpool er komið í 16-liða úrslit Meistaradeildarinnar eftir leik við RB Salzburg í riðlakeppninni í gær. Liverpool átti í hættu á að detta úr keppni með tapi en ríkjandi meistarar unnu góðan útisigur. Þeir Naby Keita og Sadio Mane skoruðu mörk Liverpool í 2-0 sigri og vinnur liðið riðilinn.
Í liði Salzburg er einn heitasti framherji Evrópu, Erling Haaland en hann er 19 ára og er frá Noregi. Honum tókst ekki að skora í gær en útsendarar voru mættir að horfa á hann.
Sky Sports segir að 40 útsendarar frá liðum í Evrópu hafi verið mætt á völlinn, flest af þeim til að taka út Haaland.
Þar á meðal var Marcel Bout, sem er yfirnjósnari hjá Manchester United en félagið er sagt hafa gríðarlegan áhuga á Haaland.
Haaland vann með Ole Gunnar Solskjær hjá Molde en hann ku vera til sölu fyrir 17 milljónir punda í janúar.