Eiður Smári Guðjohnsen fer yfir víðan völl í FantasyGandalf, hlaðvarpsþættinum. Þar ræðir hann ýmis mál og meðal annars störf sín að ferli loknum.

Eiður er í dag aðstoðarþjálfari U21 árs landsliðsins og sérfræðingur Símans um enska boltann. Eiður er einn fremsti íþróttamaður í sögu Íslands, ferill hans sem knattspyrnumaður var magnaður.

,,Ég finn það að það er að fæðast einhver þjálfari í mér, því meira sem ég er á vellinum að stjórna. Því meira hef ég gaman, ég hugsa að ég verði alltaf eitthvað í sjónvarpi. Þetta eru skrefin sem ég hugsaði undir lokin á ferlinum,“ sagði Eiður léttur í spjalli við Huga Halldórsson og Ingimar Helga.

Eiður Smári segir fjármál vera einkamál: „Ég hef aldrei borið sérstaklega virðingu fyrir pening“

Eiður hafði hugsað sér að fara í umboðsmennsku, faðir hans starfaði sem slíkur. Eftir að hafa hugsað málið, hafði Eiður ekki áhuga á slíku. Umboðsmenn eru umdeildir í knattspyrnuheiminum.

,,Það var hugmynd að fara í umboðsmennsku en það er svo ömurlegur og svartur heimur, ég vildi ekki taka þátt í honum. Ég hef alveg samvisku í hann, pabbi var í þessum heimi. Þetta er djöfullegt, mér leiðist þessi partur af fótboltanum.“