Magnús Már Einarsson hefur verið ráðinn þjálfari Aftureldingar, þetta var staðfest nú rétt í þessu.
Tilkynnt var um ráðninguna á Magnúsi, þegar nýtt knatthús var vígt í Mosfellsbæ í dag.

Magnús var áður aðstoðarþjálfari liðsins en tekur við af Arnari Hallssyni, sem sagði starfi sínu lausu eftir tímabilið.

Magnús er aðeins þrítugur og fær því þetta stóra tækifæri, ungur að árum. Afturelding hélt sæti sínu í 1. deildinni í sumar.

Magnús er vel þekktur í fótboltaheiminum en hann hefur starfað sem fréttamaður á Fótbolta.net í 17 ár, lengst af sem ritstjóri. Hann er afar virtur í starfi sínu.

Magnúsi til aðstoðar verður Enes Cogic sem lengi hefur starfað og spilað knattspyrnu á Íslandi.