Fimleikafélag Hafnarfjarðar hélt í dag upp á 90 ára afmæli félagsins með opnu húsi í Kaplakrika þar sem yfir 1000 manns mættu og kynntu sér starf deilda félagsins; knattspyrnu, handbolta, frjálsra íþrótta og skylminga. Rúsínan í pylsuendanum var svo opnun Skessunnar, knattspyrnuhúss í fullri stærð sem mun gjörbylta aðstöðu til knattspyrnuiðkunar í Kaplakrika.

Viðar Halldórsson, formaður FH sagði „Í dag opnum við glæsilegasta og hagkvæmasta knatthús landsins. Aðdragandinn hefur tekið sinn tíma en með þrautseigju höfum við náð markmiðinu, Skessan er risinn.“

Valdimar Svavarsson formaður knattspyrnudeildar FH sagði í ræðu sinni að „Skessan á eftir að verða bylting í aðstöðu og skapa tækifæri fyrir félagið og iðkendur í að ná lengra og gera enn betur. Það er okkar markmið. Áfram FH”

FH var stofnað 15. október 1929 af tíu mönnum undir forystu Hallsteins Hinrikssonar sem þá var nýráðinn til leikfimiskennslu í skólum bæjarins. Fimleikar voru fyrsta og eina íþróttagreinin sem stunduð var hjá félaginu til að byrja með en síðar bættust við frjálsar íþróttir, handbolti, fótbolti og skylmingar. Fjórar síðastnefndu íþróttagreinar eru enn stundaðar hjá félaginu í dag. FH er eitt sigursælasta lið landsins og hefur unnið til fjölda Íslands- og bikarmeistaratitla á þessum 90 árum í öllum deildum bæði í karla og kvennaflokki.

FH-ingar halda áfram afmælisfögnuði í kvöld með hátíðarkvöldverði í Kaplakrika.