Emil Hallfreðsson, landsliðsmaður í knattspyrnu hefur staðfest að Roma hafi áhuga á sér. Félagið skoðar kosti sína og er Emil einn af þeim sem félagið hefur áhuga á. Emil var gestur í hlaðvarpsþættinum, Fantasy​Gandalf.

Fyrst var fjallað um málið í gær. Þar er vitnað í ítalska miðla. Roma vantar miðjumenn en þeir Bryan Cristante, Lorenzo Pellegrini, Amadou Diawara og Henrikh Mkhitaryan eru allir frá vegna meiðsla.

Glugginn á Ítalíu er lokaður eins og á öðrum stöðum, félagið má því aðeins semja við leikmenn án félags og sem eru frá Evrópu. Emil hefur verið án félags síðan í sumar þegar samningur hans við Udinese rann út, hann er 35 ára gamall og leitar að nýju félagi.

,,Þetta er í vinnslu, ég veit að það eru mikil meiðsli hjá Roma. Þeir geta ekki fengið leikmenn nema frá Evrópu, sem eru án samnings. Ég mögulega kem til greina,“ sagði Emil í þættinum.

,,Það er búin að vera einhver umræða, svo er spurning hvort það fari enn lengra. Það verður að koma í ljós, ég er að vonast til að þetta gerist.“

,,Það er erfitt að segja eitthvað, þeir eru með haug af meiðslum. Þess vegna kom þetta upp, það er eitthvað í land að þetta verði af einhverju.“