Ole Gunnar Solskjær, knattspyrnustjóri Manchester United, segir að félagið þurfi aðeins einn til tvo leikmenn til að geta blandað sér í baráttuna um eitt af fjórum efstu sætum úrvalsdeildarinnar. Þetta segir Solskjær í nýju viðtali við sinn gamla kollega Gary Neville.

United hefur byrjað tímabilið skelfilega í ensku úrvalsdeildinni og situr liðið í 12. sæti með 9 stig eftir 8 umferðir. Stórt verkefni bíður United um helgina þegar topplið Liverpool kemur í heimsókn en Liverpool er búið að vinna alla átta leiki sína í deildinni.

Solsækjær segir að félagið eigi peninga til að kaupa leikmenn í janúarglugganum en varaði þó við því að janúarglugginn væri erfiður. „Ef við finnum réttu leikmennina fyrir rétt verð þá er ég viss um að við munum kaupa. Hugsanlega koma einhverjir reynslumiklir leikmenn inn sem geta hjálpað yngri leikmönnum.“

Solskjær segir að félagið muni ekki verja háum fjárhæðum í leikmenn sem henta félaginu ekki – eitthvað sem United hefur brennt sig rækilega á undanfarin misseri.

Solskjær segist þess fullviss að félagið hafi alla burði til að komast í baráttuna um sæti í Meistaradeildinni. „Auðvitað, við erum að leita að 1-2 nýjum leikmönnum og ef það verður möguleiki að fá nýja leikmenn munum við gera það. Ef ekki þá munu þeir leikmenn sem hér eru gefa allt sitt.“

Solsækjær segist að lokum ekki vera hræddur um að missa starfið, en ítalskir fjölmiðlar orðuðu Massimiliano Allegri við stöðuna. Segir Solskjær að öll hans samtöl við eigendur félagsins og Ed Woodward miðist við það að hann fái að minnsta kosti þrjú ár hjá félaginu.