Hannes Þór Halldórsson, markvörður íslenska landsliðsins greindi frá því við Fótbolta.net í vikunni að hann væri hættu að fylgjast með umræðunni og lesa hana. Hann kveðst hafa eytt öllum samfélagsmiðlum úr símanum sínum.

,,Þessi fréttavika var á margan hátt áhugaverð, Hannes Þór Halldórsson greinir frá því að hann sé búinn að eyða öllu úr símanum sínum. Bara hættur að fylgjast, gott og vel. Gott hjá honum að gera það, eru það veikleikamerki að segja frá svona?,“ spurði maðurinn með æðstu gráðu í fótboltafræðunum, Hjörvar Hafliðason í nýjasta þætti dagsins.

Kristján Óli Sigurðsson var fljótur til svars. ,,Sérstaklega þegar þú ert að ljúga.“

Mikael Nikulásson telur að Hannes muni hlusta á nýjasta þátt af Dr. Football. ,,Það er eitthvað sem segir mér að Hannes verði mættur með heyrnartólin í dag, og hlusti á Dr-inn. Það eru landsleikir núna og hann reynir að einbeita sér að þeim.“

Mikael skilur þó hvað Hannes á við, Hannes hefur mátt þola mikla gagnrýni eftir að hann kom heim í Val. Sérstaklega þegar hann fór í brúðkaup Gylfa Þórs Sigurðssonar í sumar.

,,Ég skil hann að mörgu leyti, Hannes er rosalega næs náungi. Það hefur aldrei verið neitt nema, klapp á bakið. Þetta er frábær náungi, gerir engum neitt. Toppmaður, það er búið að liggja á honum í sumar. Hann hefur ekki verið að standa sig vel, hann fór í þetta brúðkaup. Þóttist vera meiddur og var ekkert meiddur,“ sagði Mikael en Hannes hefur reyndar staðfest að hann var meiddur, og fékk því frí frá leik Vals til að fara til Ítalíu.

Hannes var magnaður með landsliðinu í sumar og mun standa vaktina í marki liðsins gegn Moldóvu á morgun. ,,Hann var frábær í landsleikjunum. Sem betu fer, ef hann hefði skitið í landsleikjunum gegn Tyrklandi og Albaníu, þá væri hann búinn að slökkva á öllu.“

,,Hann klárar þessa leiki núna, tímabilið er búið með Val og svo kveikir hann á öllu aftur.“

Þátt dagsins má heyra hér að neðan.