Andy Carroll var ekki mikill knattspyrnuaðdáandi þegar hann var keyptur til Liverpool fyrir 35 milljónir punda árið 2011.

Carroll var þá 22 ára gamall en hann kom til Liverpool frá Newcastle þar sem hann var grimmur markaskorari.

Carroll hefur nú greint frá því að hann hafi ekki þekkt nema tvo leikmenn Liverpool áður en hann samdi við félagið.

,,Þegar ég var hjá Newcastle þá fór ég heim, lék mér með vinum mínum, spilaði fótbolta, fór út en ég horfði aldrei á fótbolta, ég þekkti enga leikmenn,“ sagði Carroll.

,,Ég kom inn á föstudegi eða vaknaði á laugardagsmorgni og spurði við hvern við værum að spila.“

,,Ég var alveg blindur þegar kom að því sem var í gangi. Þar til við funduðum þá vissi ég aldrei við hvern við vorum að spila nema ég spurði einhvern.“

,,Þegar ég tók þyrluna til Liverpool þá þekkti ég Jamie Carragher og Steven Gerrard, hvern annan?“

,,Umboðsmaður minn á þessum tíma þurfti að segja mér frá þeim og ég fann þá á Google.“