Íslenska landsliðið hefur leik í undankeppni Evrópumótsins, í kvöld. Liðið mætir þá Andorra klukkan 19:45. Leikurinn verður afar áhugaverður.
Andorra er ekki hátt skrifað lið en hefur náð góðum úrslitum á heimavelli, liðið pakkar í vörn og beitir öllum helstu brögðum til að kreista fram úrslit. Íslenska liðið gæti þurft að sýna mikla þolinmæði.
Gengi liðsins hefur ekki verið gott undanfarið og Erik Hamren á eftir að vinna sinn fyrsta leik í starfi.
Við tókum saman fimm mikilvægustu leikmenn landsliðsins sem allir verða að eiga góða undankeppni.
1. Gylfi Þór Sigurðsson
Það munu koma augnablik í þessari undankeppni, þar sem afburða hæfileikar Gylfa verða að vinna leiki fyrir okkur. Er yfirburðar leikmaður í liðinu og hefur sannað það svo oft.
2. Aron Einar Gunnarsson
Nærvera Arons innan vallar er iðulega nóg til þess að aðrir leikmenn stígi upp og spili betur, er leiðtogi liðsins.
3. Alfreð Finnbogason
Eini framherji liðsins sem skorar reglulega fyrir landsliðið um þessar mundir, það er því mikilvægt að Alfreð verði í markaskónum mjög reglulega í þeim tíu leikjum sem eru í þessari undankeppni.
4. Jóhann Berg Guðmundsson
Mikilvægi hans sást hvað best í Rússlandi, þar meiddist hann í fyrsta leik og liðið fann fyrir því, sem og í Evrópudeildinni í haust. Íslenska liðið má ekki við því að vera án leikmanns sem leikur stórt hlutverk í ensku úrvalsdeildinni.
5. Ragnar Sigurðsson
Til að vörnin virki, þarf Ragnar að vera í sínu besta formi. Hvort sem hann spilar með Kára Árnasyni eða Sverri Inga. Ragnar er fyrsti maður á blað í vörninni og þar stendur hann iðulega fyrir sínu.