Hörður Snævar Jónsson skrifar frá Peralada á Spáni:

Birkir Már Sævarsson, bakvörður Vals er klár í slaginn gegn Andorra á föstudag, þá hefst undankeppni EM og íslenska liðið hefur hafið undirbúning.

Birkir segir hungur í hópnum en árið 2018, vann liðið ekki einn leik. Það þarf því að snúa skútunni við og koma liðinu aftur í fremstu röð.

,,Ég held að það sé klárt að við viljum fara að vinna leiki aftur, ná frammistöðum sem við vorum að ná fyrir síðast ár. Þrátt fyrir að leikirnir á HM hafi ekki verið slæmir, þá náðum við engum úrslitum nema gegn Argentínu. Við viljum fara að sýna okkar rétta andlit,“ sagði Birkir við blaðamann þegar hann ræddi við hann á Spáni í dag.

Birkir gerir þá kröfu á liðið að vinna á föstudag en eftir viku er svo erfiður leikur gegn Frakklandi.

,,Það er alveg ljóst að ef við ætlum að gera eitthvað í þessum riðli, þá verðum við að ná í þrjú stig. Þetta er fyrsti leikurinn og mikilvægt að byrja vel,“ sagði Birkir sem segir markmið liðsins á hreinu.

,,Það er klárt, við ætlum okkur að fara á EM. Þá verðum að taka sigur á föstudag,“ sagði bakvörðurinn. Birkir er ólíkt öðrum leikmönnum á undirbúningstímabili enda leikur hann á Íslandi.

,,Það gengur vel, ég hef getað æft allt undirbúningstímabilið, ég missti af nokkrum mánuðum í fyrra. Ég hef náð að æfa vel, hugsað vel um mig. Með þessa leiki í kollinum, ég hef æft vel fyrir þessa mars leiki.“

Viðtalið við Birki er í heild hérna.