Kristján Jónsson, blaðamaður Morgunblaðsins skrifar skemmtilegan og góðan Bakvörð í blað dagsins í dag. Þar segir hann frá skoðun sinni að á Íslandsmótinu í fótbolta er nú farið að leika innandyra.

Fjölnir og Fylkir þurftu að gera það í Pepsi deild karla á síðustu leiktíð og nú er ljóst að HK sem eru nýliðar spila alla leiki sína innandyra. HK leikur í Kórnum líkt og síðustu ár.

,,Bakvörður dagsins er hugsi yfir þeirri þróun að nú færist í vöxt að leikið sé innandyra í efstu deild
á Íslandsmótinu í knattspyrnu. Þegar keppt er í knattspyrnu hefur það oftast nær verið hugsað sem utanhússíþróttagrein. Á síðasta keppnistímabili var þó nokkuð af leikjum spilað innandyra í efstu deild karla. Fylkir og Fjölnir færðu sig bæði tímabundið inn í Egilshöllina. Fjölnir lék þar fyrstu tvo leikina þar sem þeirra heimavöllur þótti ekki leikfær. Fylkir lék út júlí í Egilshöllinni á meðan framkvæmdir stóðu yfir í Lautinni,“ skrifar Kristján í Morgunblaðið.

Hann segir að í fótbolta eigi veður og vindar að geta haft áhrif, það gerist ekki hjá HK.

,,Nú liggur fyrir að nýliðar HK munu spila í Kórnum í Kórahverfinu næsta sumar eins og þeir hafa gert síðustu árin. Fjölgar þar með leikjum innandyra í efstu deild Íslandsmótsins. Mér finnst þetta vera sérkennileg tilhugsun. Nú er ég ekki að velta mér upp úr gervigrasinu í þessu sambandi. Heldur vegna þess að í knattspyrnu er gert ráð að veður og vindar spili inn í. Með því að keppa í íþróttinni innanhúss er búið að taka þann þátt út úr leiknum. Á Íslandsmótinu í knattspyrnu er hægt að gera ráð fyrir köldu veðri og sæmilega hlýju. Einnig rigningu, sjókomu, sól, roki og logni. Öll þessi afbrigði gætu þess vegna birst leikmönnum í einum og sama leiknum ef íslensku veðurguðirnir eru í því stuðinu.“

Kristján „þorir“ þó ekki að hnýta í HK enda er yfirmaður hans, Víðir Sigurðsson, harður HK-ingur.

,,Með þessu er ég ekki að hnýta í HK-inga (enda er slíkt hvort sem er harðbannað á minni deild). Þeir
hafa sjálfsagt sínar praktísku ástæður fyrir því að nota Kórinn sem mest. En ég get ekki að því gert að mér finnst að knattspyrnan eigi að vera utanhússíþrótt eins og víðast hvar í heiminum. Fyrir utan stöku undantekningar í upphafi mótsins.“

Pepsi Max deildin á 433 er í boði