Gylfi Þór Sigurðsson, leikmaður Everton, hefur tjáð sig um það sem hefur gengið á hjá félaginu undanfarið ár.

Margar breytingar hafa átt sér stað hjá Everton en Gylfi kom til félagsins í fyrra frá Swansea.

Ronald Koeman fékk Gylfa til liðsins áður en hann var rekinn og tók Sam Allardyce við.

Allardyce stýrði Everton út síðustu leiktíð en Marco Silva er nú tekinn við og eru enn fleiri breytingar að eiga sér stað.

,,Síðasta ár var töluvert öðruvísi en venjulegt ár hjá fótboltaliði. Það voru margar breytingar hérna og hver stjóri kom inn með sínar hugmyndir og sinn leikstíl en flestir leikmennirnir búa yfir reynslu og þekkja stjóraskipti,“ sagði Gylfi.

,,Við höfum gert þetta áður og þetta mun gerast aftur einhvern tímann á ferlinum. Með breytingunum þá þarftu að spila öðruvísi og fara öðruvísi að hlutunum og það var ekki óskastaða fyrir okkur.“

,,Við erum þó komnir með mjög góðan stjóra og hann mun standa sig vel með okkur. Við reynum að bæta okkur varnarlega og vera vissir um að við séum klárir í fyrsta leik.“

,,Við viljum byrja vel en það sem við höfum æft mest eru taktískar breytingar og að koma okkur í form á æfingum. Þetta hefur gengið vel og strákarnir eru tilbúnir fyrir helgina.“