Það hefur margt áhugavert komið fram í þættinum Draumurinn um HM sem Edda Sif Pálsdóttir var með á RÚV. Þættirnir kláruðust um síðustu helgi en þar var rætt við Sverrir Inga Ingason og Jóhann Berg Guðmundsson. Sverrir er iðulega í herbergi með Gylfa Þór Sigurðssyni í landsliðsferðum.
Hann segir að það geti verið þreytt að vera með Gylfa í herbergi þegar hann fer að fylgjast með fiskibátum á Íslandi en Gylfi situr í stjórn félags sem á báta.
,,Gylfi er nokkuð solid, það er svona þegar hann er farin í að fylgjast með fiskibátnum. Það er mjög þreytt, þegar hann er að horfa á sjómennina veiða. Það er ekkert að frétta þarna,“ sagði Sverrir á RÚV.
Jóhann Berg tók í sama streng og segir að Gylfi geri lítið annað heima hjá sér en að fylgjast með veiðum.
,,Vá hvað það er þreytt, úfffff. Ég fer oft heim til hans og þá er hann að horfa á það, það er hræðilegt.“
Gylfi var spurður um málið og segir þá félaga ýkja all hressilega.
,,Maður fylgist aðeins með fyrirtækinu heima og hvernig gengur að veiða en þeir náttúrulega ýkja svo mikið. Sverrir hefur kannski séð mig fylgjast með þessu 2-3 og Jói tekur bara í sama streng.“
