Eins og alþjóð veit hefur Rúrik Gíslason sópað til sín ótrúlegum fjölda nýrra fylgjenda á Instagram eftir leikinn gegn Argentínu á laugardag. Fylgjendafjöldinn hefur margfaldast en áður en mótið hófst var Rúrik með rúmlega 30 þúsund fylgjendur. Þegar þessi frétt er skrifuð eru fylgjendur Rúriks orðnir 382 þúsund.
Þessar miklu vinsældir hafa vakið verðskuldaða athygli og nú hefur veðmálasíðan Coolbet.com gefið notendum sínum þann möguleika að veðja á vinsældirnar.
Veðmálið hljómar þannig að notendur geta veðjað á hvort fylgjendahópur Rúrkis verði kominn yfir eina milljón áður en mótið er á enda. Stuðullinn sem síðan gefur er 3.o þegar þessi frétt er skrifuð en það þýðir að þeir sem veðja á að Rúrik nái því, þrefalda pening sinn.
Til marks um vinsældir Rúriks þá hlóð hann upp nýrri mynd á Instagram í morgun. Á myndinni má sjá Rúrik í baráttunni við Lionel Messi. Aðdáendur Rúriks voru ekki lengi að taka við sér og tíu mínútum eftir að hún kom inn voru rúmlega átta þúsund fylgjendur hans búnir að setja „læk“ á hana.
