Félagarnir Grétar Jónsson og Kristbjörn Hilmir Kjartansson þurfa að koma Lada Sport jeppanum sínum á verkstæði. Líkt og DV greindi frá í síðustu viku þá ákváðu þeir félagarnir, sem leigja saman, að keyra til Rússlands á Lödu Sport árgerð 2010 sem er máluð í íslensku fánalitunum.
Þeir lögðu af stað frá höfuðborginni til Seyðisfjarðar 5.júní og tóku Norrænu til Danmerkur. Þaðan keyrðu þeir í gegnum Þýskaland, Pólland, Litháen, Lettland og inn í Rússland. „Þetta gekk allt eins og í sögu. Það voru engin vandamál. Bíllinn keyrði vel og við urðum ekkert tæpir í líkamanum eftir alla keyrsluna,“ sagði Kristbjörn í viðtali í Bítinu á Bylgjunni í morgun. Þeir Kristbjörn og Grétar komust til Moskvu á leik Íslands og Argentínu en það var hægara sagt en gert að keyra í gengum Moskvu. „Það er algjör bilun.“
„Umferðin þarna. Það er ekki hægt að lýsa henni. Við vorum tvo og hálfan tíma að keyra 20 kílómetra á milli hótel. Það er rosaleg umferð og þeir eru ekkert tillitssamir í umferðinni Rússarnir heldur. Maður þarf að keyra ansi greitt til að verða ekki bara stopp,“ segir Kristbjörn.
Ladan þarf nú að komast á verkstæði. „Kælingin á vélinni er farin þannig að við viljum ekki vera í umferð, þá bræðir hann úr sér. Svo ætluðum við að tjékka olíunni og bæta á vatnið þá sleit ég vírinn til að opna húddið þannig að ég get ekki gert neitt,“ segir Kristbjörn.
Nú eru þeir félagarnir komnir til bæjarins Tambov, 500 kílómetrum frá Volgograd þar sem Ísland spilar við Nígeríu á föstudaginn. „Það talar enginn stakt orð í ensku en við ætlum að reyna að finna verkstæði, eða þá Löduumboðið, þau eru út um allt og biðja þá um aðstoð.“
Kristbjörn gerði ráð fyrir vandamálum með bílinn mun fyrr. „Hann er að standa sig og þetta er búið að vera mun þægilegra og betra en ég hafði áætlað.“
Bílinn vekur mikla athygli hvert sem hann fer enda er íslenska landsliðið á allra vörum. „Hann hefur vakið gríðarlega athygli. Rússarnir eru rosalega hrifnir af þessu, að við höfum farið á Lödu Sport, eða Nivu eins og þeir kalla þetta.“ Þeir eru þegar búnir að tala við 30-40 fjölmiðla í Rússlandi sem vildu hitta okkur í Moskvu. „Við höfum ekki tíma í það, við viljum bara horfa á leikinn og njóta. Þannig að það kom upp brandari hjá okkur að bjóða bara til blaðamannafundar,“ segir Kristbjörn. Það fór sem svo að vinkona Grétars skipulagði fyrir þá blaðamannafund í Scandinavia Club í Moskvu. „Það mættu 10-15 blaðamenn og sjónvarpsmyndavélar.“
