„Seint aðfaranótt sunnudags hitti ég stúlku sem ég þekkti ekki. Við áttum stutt samskipti og ég snerti hana á ósæmilegan hátt. Af þessu var tekið myndband sem er nú í dreifingu.“

Þannig hefst afsökunarbeiðni sem Björn Bragi Arnarsson birtir á Facebook-síðu sinni núna í nótt. DV greindi frá myndbandi þar sem skemmtikrafturinn og uppistandarinn Björn Bragi þuklaði á stúlku undir lögaldri. Átti atvikið sér stað eftir skemmtun hjá KPMG á Akureyri, en Björn var veislustjóri þar. DV hafði ítrekað samband við Björn Braga vegna málsins en hann svaraði ekki fjölmiðlum. Hann hefur nú sent frá sér afsökunarbeiðni. Björn segir:

„Þessi hegðun mín var algjörlega óásættanleg og ég er miður mín yfir því að hafa hagað mér með þessum hætti. Það að ég hafi verið undir áhrifum áfengis er engin afsökun.“

Björn heldur áfram:

„Ég setti mig í samband við stúlkuna og fjölskyldu hennar fyrr í kvöld. Ég bað hana einlægrar afsökunar á framkomu minni. Ég gekk of langt og tek fulla ábyrgð á þessu atviki.

Ég átti gott samtal við móður stúlkunnar. Hún sagði mér að fjölmiðlar hefðu reynt að ná sambandi við bæði sig og stúlkuna. Hún vildi koma á framfæri ósk um að þau yrðu látin í friði. Það vil ég líka gera. Ég ber alla ábyrgð hér.“