Nú vinna starfsmenn forsætisráðuneytisins að könnun á hvort það sé góður kostur að seinka klukkunni hér á landi um eina klukkustund. Frá 1968 hefur klukkan hér á landi verið óbreytt en víðast annarsstaðar í Evrópu er notast við sumar- og vetrartíma. Forsætisráðuneytið telur að málið falli undir „annað“ hvað varðar skiptingu mála á milli ráðuneyta og því er Katrín Jakobsdóttir, forsætisráðherra, um leið „klukkumálaráðherra“ landsins.

Fréttablaðið skýrir frá þessu í dag. Fram kemur að í skýrslu starfshóps forsætisráðuneytisins um málið hafi komið fram að núverandi fyrirkomulag, þar sem miðað er við miðtíma Greenwich þrátt fyrir að Ísland sé talsvert vestan miðlínu, hafi ýmis neikvæð áhrif á heilsufar fólks. Meðal þessara áhrifa eru auknar líkur á ýmsum sjúkdómum, aukinni depurð, lélegri námsárangri og klukkuþreytu. Starfshópurinn leggur ekki til að tekinn verði upp sumar- og vetrartími enda væri það kannski á skjön við það sem nú er að gerast í Evrópu þar sem stefnir í að mörg ríki hætti að notast við sumar- og vetrartíma.

Fréttablaðið hefur eftir Katínu að málið sé ekki á þingmálaskrá hennar fyrir yfirstandandi þing en verið sé að fara yfir málið í ráðuneytinu.

Í gegnum tíðina hafa þingsályktunartillögur um breytingu klukkunnar verið lagðar fram en hafa ekki hlotið brautargengi. Mörg sjónarmið eru með og á móti klukkubreytingu og víst að aldrei næst full sátt um við hvað á að miða klukkuna hér, miðtíma Greenwich eða eitthvað annað.