Fréttastofa RÚV gerði þau mistök á dögunum að birta mynd úr tölvuleiknum GTA 4 við frétt sem fjallaði um harmleik í Tennessee. Tölvuleikurinn er þekktur fyrir góða grafík en þó ætti að vera augljóst að ekki sé um mynd úr raunveruleikanum að ræða.
Fréttin sem birtist á vef RÚV rétt fyrir klukkan sjö að kvöldi síðastliðinn sunnudag fjallaði um skotárás við kirkju í Tennessee. Ein kona var skotin til bana og sjö særðust í árásinni sem átti sér stað í bænum Antioch í nágrenni við Nashville. Myndin sem fylgdi fréttinni sýnir lögreglubíl merktan borginni Liberty City, en sú borg er sögusvið tölvuleiksins.
Athygli var vakin á þessum mistökum RÚV innan Facebook-hópsins PS4 í gær. „Ekki vissi ég að Liberty City væri undir skotárás, það kemur mjög svo á óvart… svona miðað við að myndin við þessa frétt er úr GTA. Vel spilað RÚV… vel spilað,“ segir sá sem deildi fréttinni innan hópsins.