Aðalmeðferð í máli Thomas Møller Olsen, sem er sakaður um að hafa myrt Birnu Brjánsdóttur, hélt áfram í dag. Nú í morgun hafa bæði lögreglumenn og sérfræðingar borið vitni. Björgvin Sigurðsson, sérfræðingur við tæknideild Lögreglunnar á höfuðborgarsvæðinu, bar vitni nú á ellefta tímanum.

Björgvin kom að fyrstu skoðun á Kia Rio bifreiðinni. Þar fundust blettir á afturhlera og blóðblettir á fölsum á hurðum. Þá þyrfti frekari rannsókn og blóðferlasérfræðing. Síðar rannsakaði hann aftursætið og komu þá í ljós blettir, sem lögregla taldi að væri sæði þó það hafi ekki fengist staðfest. „Grunur um sæði, fékkst hins vegar ekki svörun. Fjölmörg blóðsýni voru tekin úr bílnum. Öll sýnin úr Birnu: aftursæti, hraðamæli, sólskyggni, lofti og fleiri stöðum,“ sagði Björgvin.

Björgvin sagði að ekkert grunsamlegt hafi fundist á klæðnaði Nikolaj en það sama sé ekki hægt að segja um fatnað Thomasar. „Það var fatnaður í þvottavél, peysa og bolur. Ekkert sjáanlegt á fatnaðinum. Síðar fannst svörun á bolnum um blóð. Bómull drekkur í sig vökva, það getur verið skýring,“ sagði Björgvin.

Svo var úlpa í eigum Thomasar. „Við vinstri brjóstvasa var blóðblettur. DNA rannsakaður, úr Birnu. Kámblettur, ekki sletta,“ sagði Björgvin. Í réttarsal var sýnd mynd af af blóðbletti úr úlpunni og úlpunni sjálfri eftir lúminol próf. Björgvin gat ekki sagt til um nákvæmlega hvar blóðið kom í úlpuna. „Þvotturinn mengar rannsóknina,“ sagði hann.