Fjölmiðlamaður Eiríkur Jónsson skrifar fyrr í dag á vef sínum um meinta brjóstaskoru Kolbrúnar Benediktsdóttur varahéraðssaksóknara við aðalmeðferð í máli Thomas Møller Olsen, sem er sakaður um að hafa myrt Birnu Brjánsdóttur.

Eiríkur birtir mynd af Kolbrúnu frá réttarhöldum í gær og skrifar: „Saksóknari í einu stærsta morðmáli síðari tíma er í afar flegnum bol undir skikkju embættisins. Ekki við hæfi.“ Að vísu tekur Eiríkur það fram að þessi orð hafi fallið í bréfi til sín.

Hildur Lilliendahl Viggósdóttir vekur athygli á þessu á Facebook-síðu sinni og skrifar: „TAKK, ELSKU EIRÍKUR JÓNSSON FYRIR AÐ MINNA OKKUR Á AÐ VERA EKKI SVEIFLANDI BRJÓLLUNUM FRAMAN Í FÓLK SEM ER AÐ REYNA AÐ VINNA VINNUNA SÍNA“

Á stuttum tíma hefur fjöldi manns skrifað athugasemd hjá Hildi og eru flestir á því máli að umfjöllun Eiríks sé vægast sagt furðuleg. Svala Jónsdóttir blaðamaður skrifar til að mynda: „Það er náttúrulega hneyksli að það geti sést að konur séu með BRJÓST. Hvílíkur dónaskapur! Hvað er næst, berir ökklar?“