Seldist á 2,4 milljarða króna á uppboði um helgina
Bifreið af gerðinni Aston Martin varð um helgina dýrasta bifreið Bretlandseyja þegar hún seldist á uppboði um helgina.
Bifreiðin sem um ræðir er af gerðinni Aston Martin DBR1, en hún var framleidd árið 1956. Bíllinn var smíðaður fyrir Le Mans-kappaksturinn og keppti breski ökuþórinn Sir Stirling Moss meðal annars á honum.
Uppboðið fór fram hjá uppboðshúsi RM Sothesby í Kaliforníu í Bandaríkjunum og voru margir áhugasamir um bílinn. Svo fór að hann var seldur á 17,5 milljónir punda, 2,4 milljarða króna.
Tveir safnarar voru mjög áhugasamir um bílinn og skiptust þeir á að bjóða í hann. Bíllinn var metinn á 15,5 milljónir punda, 2,1 milljarð, en seldist á mun hærri upphæð.
Þetta er dýrasta bifreið sem framleidd hefur verið í Bretlandi og sá sjöunda dýrasta í sögunni sem selst hefur á svonefndu almenningsuppboði. Fimm Ferrari-bifreiðar og ein Mercedes-bifreið hafa selst á hærri upphæð.
Það sem gerir þessa bifreið einstaka er sú staðreynd að aðeins fimm bifreiðar voru framleiddar af þessari tegund á árunum 1956 til 1958, en bifreiðin um helgina var sú fyrsta sem var framleidd.