18 mánaða stúlka í Englandi hlaut djúp bitsár í andlitið – Eiganda hundsins var alveg sama
Hundur ókunnugs manns réðst á 18 mánaða stúlku í Englandi og beit hana tvívegis í andlitið.
Stúlkan, Ophelia, var með móður sinni í biðröð við bílaverkstæði í enska bænum Heanor þegar atvikið átti sér stað þann 3. apríl í síðustu viku, samkvæmt frétt á Nottingham Post.
Móðir stúlkunnar, Nicol Rozic, rak augun skyndilega í mann sem beið með þeim og hafði hund meðferðis. Dóttir Nicol, Ophelia, hefur mikið dálæti á hundum og fór því að teygja sig í átt til hans, þar sem hún sat í barnakerrunni glöð í bragði.
Nicol spurði manninn hvort dóttir sín mætti ekki klappa hundinum og hvort hann væri nokkuð grimmur. „Nei, nei! Þú mátt alveg klappa honum,“ svaraði maðurinn.
Í sömu andrá og Ophelia byrjaði að klappa hundinum, sem var af gerðinni Red Pointer, beit hann hana af fullum krafti í andlitið. Ophelia hlaut djúp sár undir hökuna og á aðra kinnina.
Starfsfólk bílaverkstæðisins hringdi á sjúkrabíl og var 18 mánaða stúlkan þegar flutt á spítala. „Þetta var allt saman mjög sláandi, við hringdum bara á sjúkrabíl og þráspurðum hana hvort það væri allt í lagi. Ég vona að hún jafni sig,“ sagði einn starfsmaður sem var á vakt.
Nicol var kasólétt og átti því erfitt með að stía hundinum frá dóttur sinni. „Hann beit hana í tvígang í andlitið og eigandinn stóð bara þarna og gerði ekki neitt!“ segir Nicol.
Maðurinn virtist ekkert gera til að halda aftur af hundi sínum, þrátt fyrir að hann væri að ráðast á 18 mánaða gamla stúlkuna – og verra en það, maðurinn yfirgaf svæðið alfarið!
Hann á að hafa sagt við Nicol að hann ætlaði að fara með hundinn upp í bíl til sín og koma aftur. En í framhaldi af því ók maðurinn bara á brott og síðan þá hefur hvorki sést tangur né tetur af honum.
Ophelia var saumuð síðastliðinn mánudag í kjölfar árásarinnar. En hún þurfti að leggjast aftur inn á spítala tveim dögum síðar, vegna sýkingar sem hún hafði fengið í sárin.
Hún er nú á batavegi og vonast skurðlæknirinn til þess að sárin grói vel, svo að sem minnst muni bera á örunum.