Væntingavísitala Gallup lækkaði lítillega á milli mars og apríl og stendur hún nú í 126,6 stigum. Greining Íslandsbanka fjallaði um þetta á vef sínum í vikunni. Ef vísitalan er yfir hundrað stig merkir það að meiri bjartsýni ríkir meðal neytenda en svartsýni.
Vísitalan skiptist í nokkrar undirvísitölur, meðal annars mat á horfum á atvinnuástandi. Hún lækkaði um 4,1 stig milli mánaða en stendur þó í 136,7 stigum. Þá lækkuðu vísitölurnar sem eiga að endurspegla mat neytenda á núverandi stöðu (-3,9 stig) og væntingar til aðstæðna eftir 6 mánuði (-1,7 stig).
„Mælist sú fyrrnefnda 149,5 stig, sem er mjög hátt sögulega séð (81 stiga meðaltal), og sú síðarnefnda 111,4 stig sem er aðeins hærra en sögulegt meðalgildi (102,4 stig). Undirvísitalan sem mælir mat neytenda á efnahagslífinu hækkar hins vegar (2,2 stig) og mælist 116,8 stig (89,5 stig sögulega),“ segir í umfjöllun Greiningar Íslandsbanka.
Þá kemur fram að talsverð fylgni hafi verið á milli væntingavísitölunnar og gengis krónunnar. Er því velt upp að lækkun vísitölunnar nú gæti tengst því að krónan hefur að jafnaði verið 1,5 prósentum veikari það sem af er aprílmánuði en hún var í mars.