Harold Backer gekk inn á lögreglustöð 15 mánuðum eftir að hann lét sig hverfa
Ekkert hafði spurst til Harold Backer frá 3. nóvember 2015 þar til um helgina að hann gaf sig fram við lögreglu. Harold þessi er fyrrverandi keppandi í róðri fyrir Kanada á þremur Ólympíuleikum árin 1984, 1988 og 1992.
Sem fyrr segir lét Harold sig hverfa síðla árs 2015 en aðeins örfáum dögum síðar hóf lögregla sakamálarannsókn á meintum fjársvikum hans. Hann hafði fengið fimmtán vini og vandamenn til að taka þátt í fjárfestingarverkefni með sér, en síðar kom á daginn að um píramídasvindl var að ræða. Hann sagði þeim sem höfðu fjárfest í verkefninu þessi tíðindi skömmu áður en hann hvarf.
Harold sagði við eiginkonu sína daginn sem hann hvarf að hann ætlaði út að hjóla. Hann skilaði sér hins vegar ekki heim aftur og þegar lögregla fór að grennslast fyrir um málið kom í ljós að Harold hafði tekið ferju frá Port Angeles í Kanada til Washington-ríkis í Bandaríkjunum.
Talið er að þeir sem fjárfestu í verkefni Harolds hafi tapað 800 þúsund Bandaríkjadölum, tæpum 90 milljónum króna á núverandi gengi.
Ekki liggur fyrir hvar Harold hélt til þessa fimmtán mánuði sem hans var saknað. Þá er ekki vitað hvað varð um þá fjármuni sem hann tók á móti. Harold mun hafa gefið sig fram við lögregluna í Kanada í síðustu viku.